Chennai Home Job

விஜய்யின், 50-வது படம் "சுறா". இந்த படத்தை, சங்கிலி முருகன் தயாரிக்கிறார். இவர், ஏற்கெனவே விஜய் நடித்த "காதலுக்கு மரியாதை" படத்தை தயாரித்தவர். எஸ்.பி.ராஜ்குமார் இயக்குகிறார். இவர், "பொன்மனம்", "என் புருஷன் குழந்தை மாதிரி", "கார்மேகம்" (மலையாளம்) ஆகிய படங்களை இயக்கியவர். சமீபத்தில் ஆர்.கே., பானு நடித்த "அழகர் மலை" என்ற படத்தை இயக்கியுள்ளார் எஸ்.பி.ராஜ்குமார். விஜய் இதில் மீனவராக நடிக்கிறார். இவருக்கு ஜோடியாக தமன்னா நடிக்கிறார். இவர்களோடு வடிவேலு, பசுபதி, ஸ்ரீமன் ஆகியோரும் நடிக்கிறார்கள். தெலுங்கில் மிகப்பெரிய வெற்றியடைந்த "மஹாதீரா" படத்தின் வில்லன் தேவ் கில், இந்தப்படம் மூலம் தமிழில் வில்லனாக அறிமுகமாகிறார். கடலும் கடல் சார்ந்த இடமும்தான் கதைக்களம் என்பதால் கேரளாவை படப்பிடிப்புத் தளமாக தேர்ந்தெடுத்திருக்கிறார்கள். முதல்கட்ட படப்பிடிப்பாக தூத்துக்குடியில் அறுபது நாட்கள் தொடர்ந்து நடைபெற்றது. ஆக்ஷன் படமான இதில், சண்டைக் காட்சிகளில் விஜய் அதிக ரிஸ்க் எடுத்து நடித்துள்ளார். வடிவேலுவுடன் இணைந்து நகைச்சுவையிலும் விஜய் கலக்கியுள்ளார். சமீபத்தில் பாண்டிச்சேரி அருகே இதன் படப்பிடிப்பு நடந்து முடிந்தது. பாடல் காட்சிகள் வெளிநாடுகளில் படமாகிறது. இதுவரை இல்லாத அளவு, விஜய் படங்களிலேயே அதிக பிரம்மாண்டமாக "சுறா" தயாரிக்கப்பட்டு வருகிறது. பாடல்கள்: வாலி, இசை: மணிசர்மா, ஒளிப்பதிவு: எம்.எஸ்.பிரபு, ஏகாம்பரம். எடிட்டிங்: அந்தோணி, கலை: முருகன், சண்டை: கனல் கண்ணன், வசனம்: எஸ்.பி.ராஜ்குமார். சன் பிக்சர்ஸ் வாங்கியுள்ள "சுறா" கோடை விருந்தாக ஏப்ரல் 14ல் வெளியாகிறது.